У Ігналінскім раёне патруль з трох беларускіх памежнікаў зайшоў на тэрыторыю Літвы на 2,5 метра. Вырашаецца пытанне пра распачынанне дасудовага расследавання, беларускі бок апавясцілі пра інцыдэнт. Пра гэта паведамляе Служба аховы дзяржмяжы Літвы.
Беларускія памежнікі патрулявалі сваю тэрыторыю і ішлі ў кірунку да масткоў. Масткі аказаліся заваленыя снегам, пасля чаго адзін з іх, трохі павагаўшыся, махнуў рукой і пайшоў у абыход масткоў. Ён апынуўся на літоўскай тэрыторыі. За ім пайшлі і двое іншых. Патруль апынуўся паміж бар’ерам, які перашкаджае далейшаму доступу ўглыб Літвы, і лініяй мяжы.
Гэта ўсё фіксавалася літоўскім бокам, на месца былі высланыя літоўскія памежнікі, але іх умяшанне не спатрэбілася — беларускі патруль, абышоўшы масткі, вярнуўся на тэрыторыю Беларусі.
У Літве вырашаецца пытанне пра распачынанне дасудовага расследавання. Беларускаму боку паведамілі пра інцыдэнт.