Перагледзець на восеньскай сесіі правілы атрымання часовага віду на жыхарства грамадзянамі Беларусі заклікаў дэпутатаў літоўскага Сейма прэзідэнт краіны Гітанас Наўседа. Пры гэтым ён не стаў уносіць у парламент папраўкі, якія прадугледжваюць ураўноўванне абмежаванняў у дачыненні да беларусаў і расіян, піша LRT.
Літоўскі лідар падкрэсліў, што для бяспекі жыхароў Літвы неабходна перагледзець парадак, пры якім у грамадзян Беларусі застаецца больш магчымасцяў, у параўнанні з грамадзянамі Расіі, для ўезду ў Літву і атрымання тут часовага віду на жыхарства.
— Спадзяюся, што зноў вернуцца да прававога статусу перамяшчэння грамадзян Беларусі і Расіі праз нашую мяжу, статусу іх віду на жыхарства ў Літве. Сёння мы жывём у напружанай атмасферы, калі нам даводзіцца быць максімальна гатовымі да магчымых правакацый, магчымых спробаў дэстабілізаваць нашую ўнутрыпалітычную сітуацыю. Яна сапраўды крохкая. Мы мусім прыкласці ўсе намаганні, каб людзі ў нашай краіне маглі жыць бяспечна, — заявіў прэзідэнт журналістам.
LRT падкрэсліла, што сярод праектаў, якія ўносяцца Гітанасам Наўседам на восеньскую сесію Сейма, няма паправак што да ўраўноўвання абмежаванняў у дачыненні да беларусаў і расіян.
Літоўскі парламент пачне сваю восеньскую сесію 10 верасня.
Нагадаем, некалькі месяцаў таму ў Літве праз вайну ва Украіне на абмеркаванне дэпутатам вынеслі законапраект пра абмежаванні. У ім прапаноўвалася спыніць прыём заяваў ад грамадзян Беларусі і Расіі на атрыманне літоўскага грамадзянства, ВНЖ, візаў і ўвесці іншыя санкцыі. Але частку абмежаванняў для беларусаў з законапраекта ўдалося выключыць, і дэпутаты ўхвалілі змякчаны варыянт. Прэзідэнт Літвы Гітанас Наўседа наклаў на яго вета і вярнуў на паўторны разгляд, але Сейм адхіліў вета і прыняў закон без паправак, у больш мяккім для беларусаў варыянце.
Чарговыя дыскусіі па гэтым пытанні пачаліся пасля таго, як Беларусь прыняла наймітаў ПВК Вагнера. У Літве асцерагаюцца, што ў краіну пад выглядам беларусаў і расіян, якія ратуюцца ад пераследу, могуць трапіць вагнераўцы.
Чытайце таксама
